סאטמארע נייעס

דינסטאג פרשת במדבר ר''ח סיון 'בצל הקודש' פון כ''ק מרן רבינו הגה''ק שליט''א

רבינו שליט''א האט געדאווענט שחרית בהיכל ישיבה קטנה 'סניף השיב משה' בהנהלת הרה''ג ר' שמעון אברהם ראטה שליט"א. פארן דאווענען האט דער רבי געלייגט תפילין פארן בר מצוה בחור ב"ר חיים צבי לעווי הי''ו.

דער רבי איז צוגעגאנגען צום עמוד צו הלל און ביים ליינען עולה געווען רביעי.

נאכן דאווענען איז פארגעקומען א מסיבת לחיים בהיכל הביהמ''ד, מען האט געזינגען עטליכע ניגונים, דער רבי האט געטרינקן לחיים און אנגעווינטשן פארן בר מצוה בחור, פאר די רמ''י הישיבה און אלע בחורים, און דערנאך משמיע געווען דברות קודש בעניני הכנה ליו"ט שבועות, ובתו''ד מעורר געווען די בחורים זיך משתתף זיין ביים מעמד לימוד שעות רציפות דעם צווייטן טאג שבועות פארן דאווענען אלץ א ריכטיגע הכנה צו קבלת התורה און צום אהבה רבה, און צוגעענדיגט מיט ברכת קדשו.

דערנאך איז דער רבי ארויף צום ביהמ"ד פון די תלמידי כתה ט' מכינה לישיבה ווי די בחורים זענען געזעצן און געלערנט, דער רבי האט זיך ארומגעדרייט צווישן די בחורים און זיך אומגעקוקט מיט א שטארקע קורת רוח.

מיטאג ארום 1:30 איז דער רבי אנגעקומען צו די זאל בביתו נאוה קודש אויף איהעל קט. ווי דער רבי האט געפראוועט א סעודת ר"ח אינאיינעם מיט רבני ולומדי כוללינו 'כולל דברי יואל' פון בארא פארק.
דער רבי האט זיך געוואשן צום סעודה און מען האט אויפגעגעבן די מאכלים אזוי ווי יו"ט, במשך די סעודה האט מען געזינגען ניגוני ר"ח און ניגוני יו"ט שבועות, נאך די זופ האט נכד רבינו הרב הערשל מייזליש שליט"א בן הגה"צ רב דביהמ''ד ישמח משה שליט"א חדב''ן, פארגעלייגט שאלות אין פארשידענע ענינים וואס איז נוגע פאר די כולל אינגעלייט, אויף וואס רבי האט געענטפערט און אויסגעשמועסט בטוב טעם ודעת א לענגערע צייט. מיט ברכו נפשי האט דער רבי מכבד געווען הרה"ג ר' חיים משה לעוו שליט"א מראה"כ,
דערנאך האט דער רבי משמיע געווען דברות קודש צום ערשט א לענגערע דרוש ופלפול בעניני חג השבועות, און דערנאך ארומגערעדט דברי הדרכה פאר די כולל אינגעלייט און בעניני הכנה לחג השבועות הבעל"ט.

מיט ברכהמ''ז האט דער רבי מכבד געווען הרה"ג ר' אלעזר ניסן שטראהלי שליט"א ראה"כ ודומ"ץ בית מדרשינו 36סט. מען האט געענדיגט ארום 3:15.

נאכמיטאג ארום 6:00 אזייגער האט דער רבי געדאווענט מנחה בביתו נאוה קודש אויף צאנז קט. און דערנאך אריינגעפארן קיין וומסב''ג צו די וועכנטליכע זמני כניסה.

ביים אנקומען האט דער רבי מנחם אבל געווען משפחת המנוח הרה"ח ר' אליעזר שאול גלאנצער ע"ה.

פון דארט איז רבינו שליט"א אריבער בבית הרבני החסיד ר' הערשל קאהן הי"ו ווי עס איז פארגעקומען א מסיבת לחיים וסיום כתיבת ס"ת וואס וועט אריינגעגעבן ווערן בבית מדרשינו בית מנחם צבי דקהל יטב לב אין וומסב"ג, דער רבי האט אריינגעשריבן די אותיות, און און דערנאך געטרינקן לחיים און ווארעם אנגעווינטשן פאר הרה"ח ר' הערשל און די גאנצע משפחה.

דערנאך האט זיך רבינו שליט''א משתתף געווען ביים סיום מסכת כתובות במסגרת חבורת יסודי התורה פאר לומדי החבורה בבית מדרשינו ברך משה בוומסב''ג, באולם לא שאטאו. דער רבי האט געטרינקן לחיים און אנגעווינטשן פארן גאנצן ציבור, און משמיע געווען דברות קודש איבער די גרויסקייט פון לימוד התורה, און ארויסגעברענגט אז מאכן א סיום מסכת פאר שבועות איז א ריכטיגע הכנה צו קבלת התורה, און צוגעענדיגט מיט ברכות לרוב פארן גאנצן ציבור.

דערנאך איז געווען זמני כניסה בקודש פנימה פון 8:45 ביז אום 12:30 אויפדערנאכט בביתו נאוה קודש בוומסב''ג. דער רבי האט געדאווענט מעריב ארום 11:30 און נאך מעריב צוגעגאנגען צום עמוד צו ספירה, און דערנאך ווייטער ממשיך געווען אויפצונעמען דעם ציבור.

▫️ סאטמאר'ע נייעס 🌴 ▫️

מאנטאג פרשת במדבר 'בצל הקודש' פון כ''ק מרן רבינו הגה''ק שליט''א

אינדערפרי איידער תפילת שחרית איז פארגעקומען די ברית לבן הנולד לר' ישראל מאיר פעלדמאן הי''ו בבית חמיו הרה"ח ר' בנציון קליין הי''ו, ווי דער רבי איז געווען סנדק.

רבינו שליט''א האט געדאווענט שחרית בהיכל ישיבה גדולה שיעור ד'. ביים אנקומען אין ישיבה איז דער רבי אריין אין ביהמ"ד ווי דער רבי האט זיך אומגעקוקט מיט א קורת רוח ביים שיעור פונעם ר"י הרה"ג ר' ארי' דוב קארנבלי שליט"א. פארן דאווענען האט דער רבי געצינדן 5 ליכט לרגל די יומדהל"ק פון הרה"ק ר' מאיר'ל מ'פרעמישלאן זי"ע. ביים ליינען האט דער רבי עולה געווען שלישי.

נאכן דאווענען איז פארגעקומען א מסיבת לחיים לרגל די יומדהל"ק, דער רבי האט געטרינקן לחיים און אנגעווינטשן פאר די ראשי ישיבה און פאר אלע בחורים, מען האט געזינגען עטליכע ניגונים און דער רבי האט משמיע געווען דברי חיזוק פאר די בחורים און ווארעם אנגעווינטשן שידוכים במהרה פאר אלע בחורים, דערנאך האט דער רבי ארומגערעדט פונעם בעל ההילולא הרה"ק ר' מאיר'ל פרעמישלאנער זי"ע, און איבערן מצב און פרעמישלאן - אוקריינע, דער רבי האט ארויסגעברענגט לשבח די פעולות פון הרה''ג ר' ישראל הערש רייך שליט''א מרמ"י הישיבה וועלכע שטייט בראש פונעם הכנסת אורחים אין שטאט פרעמישלאן, און ווארעם אנגעווינטשן אז דער מצב זאל זיך בארואיגן און ער זאל בקרוב ווייטער קענען אויפטוהן אין פרעמישלאן לטובת הכלל.

פארנאכטס ארום 8:30 האט דער רבי געדאווענט מנחה בביתו נאוה קודש אויף איהעל קט. דערנאך איז געווען זמני כניסה בקודש פנימה ביז אום 12:00 אויפדערנאכט.

רבינו שליט''א האט געליינט תנאים אין די תנאים זאל בביתו נאוה קודש פון די מחותנים ר' ישראל שלום פאלאק הי''ו - ר' אברהם שמואל בראך הי''ו.

דער רבי האט געדאווענט מעריב ארום 12:00 און דערנאך צוגעגאנגען צום עמוד צו ספירה.

▫️ סאטמאר'ע נייעס 🌴 ▫️

זונטאג פרשת במדבר 'בצל הקודש' פון כ''ק מרן רבינו הגה''ק שליט''א

אינדערפרי איידער תפילת שחרית האט רבינו שליט''א מלוה געווען די מטה פון הרה"ח ר' אליעזר שאול הכהן ברא"י גלאנצער ע"ה פארנט פון ביהמ"ד הגדול.

רבינו שליט''א האט געדאווענט שחרית אין ביהמ"ד הגדול. פארן דאווענען האט דער רבי געלייגט תפילין פאר די בר מצוה בחורים.
ב"ר יקותיאל אהרן רובין הי''ו.
ב"ר יושע בודק הי''ו.
ב"ר יוסף גאלדבערגער הי''ו.
ב"ר איתמר טובי' ווידער הי''ו.
ב"ר יודא מיטטעלמאן הי''ו.

נאכן דאווענען איז פארגעקומען א לחיים מיט די בר מצוה בחורים בחדרו הפרטי.

פארנאכטס ארום 8:30 האט דער רבי געדאווענט מנחה בביתו נאוה קודש אויף איהעל קט. דערנאך איז געווען זמני כניסה בקודש פנימה ביז אום 1:00 אויפדערנאכט.

רבינו שליט''א האט געליינט תנאים אין די תנאים זאל בביתו נאוה קודש פון די פאלגענדע מחותנים.
ר' דוד אלי' קטינא הי''ו - הר"ר יקותיאל צבי לעווי שליט''א.
ר' נתן מאיר ליכטענשטיין הי''ו - ר' יוסף קאהן הי''ו.

דער רבי האט געדאווענט מעריב ארום 12:15, און דערנאך צוגעגאנגען צום עמוד צו ספירה.

▫️ סאטמאר'ע נייעס 🌴 ▫️

שב"ק פרשת בחוקותי 'בצל הקודש' פון כ"ק מרן רבינו הגה"ק שליט"א, בקרב קהלתינו הק' בוומסב''ג.

ערש''ק נאכמיטאג האט רבינו שליט''א אנגעטוהן דעם שטריימל פאר החתן משה בער ב''ר עקיבא יוסף ניישטאדט הי''ו.

פרייטאג צונאכטס ארום 8:40 איז רבינו שליט''א אריינגעקומען אין ביהמ"ד מעוטף בטליתו און צוגעגאנגען צו מנחה. קבלת שבת: הרה"ג ר' אלעזר מענדל פילאפף שליט''א, און נאך מעריב איז דער רבי צוגעגאנגען צום עמוד צו ספירה.

מען האט געענדיגט דאווענען ארום 10:15. דער עולם אריבער געגאנגען גוט שבת זאגן און שלום נעמען, און רבינו שליט''א איז אריין לחדרו הפרטי.

א קורצע צייט נאכן דאווענען איז רבינו שליט''א אריינגעקומען צום שלחה"ט אין ביהמ"ד בנין הילמאן בהיכל תהילת יהוסף אינאיינעם מיט די תלמידי שיעור ג' פון די סניפי הישיבות קטנות, און אנגעהויבן כדרכו בקודש 'שלום עליכם' ברגש ובנעימה.

פאר די פיש האט דער רבי געזאגט תורה אויפ'ן פסוק אם בחוקותי תלכו און געטייטשט אז ביי די תורה איז וואס מער מען לערנט שפירט מען אלס מער דאס מתיקות דערין, אנדערש ווי אנדערע תאוות עולם הזה, און געלאדענט די בחורים אויף א סדר לימוד מיוחד פון 2 שעה דעם צווייטן טאג שבועות בביהמ''ד הגדול וואס דאס וועט זיין די ריכטיגע הכנה צו קבלת התורה, ווי אונז פסק'ן מיר בז' נתנה תורה.

פאר די זופ האט דער רבי נאכאמאל געזאגט תורה און מעורר געווען אויף חזרת הלימודים ווען מען פארט אוועק אויף זומער אין די קעמפס.

מיט די זמירות האט רבינו שליט''א מכבד געווען די מנהלי הישיבות. כל מקדש: הרה''ג ר' הערשל אשכנזי שליט''א מנהל סניף באר התורה, מנוחה ושמחה: הרה"ג ר' יודל שטאלצבערג שליט''א מנהל סניף היכל התורה.

רבינו שליט''א האט געזאגט תורה אויפן פסוק "אם בחוקותי תלכו" און געטייטשט בדרך דרוש אין די סוגיא פון מוסיפין מחול על הקודש.

קה אכסוף: הרה''ג ר' נטע מאשקאוויטש שליט''א מנהל סניף מבצר התורה, ברכהמ"ז: הגה''צ אבד''ק וומסב"ג שליט''א.

עובדות וסיפורים די וואך האט רבינו שליט''א דערציילט פון הרה''ק רבי ר' מאיר'ל מפרעמישלאן זי"ע, וואס די יארצייט געפאלט מאנטאג כ''ט אייר. קה רבון עלם: הרה''ג ר' משה אשר צאלער שליט''א מנהל סניף חכמת התורה.

די פרישע חתנים זענען אדורך נעמען פירות, און עס איז פארגעקומען די שלום זכר ביי בן הנולד לר' שמואל שמעלקא מיטטלמאן הי''ו. אז ביום השביעי: הרה''ג ר' חיים דוד רובין שליט''א רב דביהמ"ד אוהל תורה. מען האט געענדיגט ארום 1:40.

וביום השבת קודש

שב"ק צופרי איז רבינו שליט''א אריינגעקומען 9:40. פסוקי דזמרה: הר''ר יעקב ברז''ל גליק הי''ו, צו שחרית איז רבינו שליט''א צוגעגאנגען.

הוצאה והכנסה: הרה''ג ר' מנחם זאב שטערן שליט''א מו''ץ בקהלתינו, פסוקי שמע ישראל: הרה''ג ר' יואל שווארץ שליט''א דומ''ץ ביהמ''ד בנין געלבשטיין. בעל קורא: הרה''ח ר' מענדל מיטטלמאן הי''ו.

עליות. כהן: הר''ר יעקב ברז''ל גליק הי''ו, לוי: הרה''ח ר' נחמן דוב העלער הי''ו, שלישי: הרה''ח ר' יעקב הערש ניישטאדט הי''ו, רביעי: הרה''ח ר' אייזיק שטיין הי''ו, חמישי: בעל שמחה ר' יואל בר''ב הירש הי''ו - רבינו שליט"א האט געמאכט דעם מי שברך וקריאת השם לרגל הולדת בתו למז"ט, שישי: רבינו שליט''א.

נאכן עולה זיין האט רבינו שליט''א געמאכט דעם מי שברך וקריאת השם לרגל הולדת הבת ביי די פאלגענדע בעלי שמחה.
ר' משה בר''י שעהר הי''ו.
ר' חיים אלעזר קויפמאן הי''ו.

שביעי: בעל שמחה ר' דוד אהרן שפילמאן הי''ו - רבינו שליט"א האט געמאכט דעם מי שברך וקריאת השם לרגל הולדת בתו למז"ט, אחרון - חזק: הגה''צ אבד''ק שליט''א, מפטיר: הרה''ח ר' שלמה זלמן שטיין הי''ו. הגבה: הרה''ח ר' אברהם פריעדמאן הי''ו, גלילה: הרה''ח ר' אברהם וואלף קויפמאן הי''ו (מאנטריאל).

נאכן ליינען האט רבינו שליט''א ראש חודש געבענטשט בהתעוררות רב.

צו מוסף איז רבינו שליט''א צוגעגאנגען לרגל די יארצייט פון זקינו הגה''ק מוואלאווע זצ''ל קומענדיגן דאנערשטאג ג' סיון, פתיחה לאנעים זמירות: הרה"ח ר' ישראל שעהר הי''ו. מען האט געענדיגט 12:35.
נאכמיטאג ארום 7:15 איז רבינו שליט''א אריינגעקומען צום פרק פארלערנען בבית מדרשינו הגדול, דער רבי האט זיך געשטעלט אויף די משנה פרק ה' משנה ו', 'עשרה דברים נבראו בערב שבת בין השמשות' און געטייטשט עטליכע מהלכים בדרך דרוש אינעם ענין צו רוב איז א וודאי אדער א ספק, יש אם למקרא, ספיקא דאורייתא מן התורה. און דערנאך בדרך אגדה ומוסר בעניני הכנה למצוה בפרט פאר שבת ויו''ט, עקסטער יעצט פאר יו''ט שבועות מען זאל זיך פירן ווי ערליכע אידן מקדמת דנא און אויך געבעטן די בעלי בתים זיך צו משתתף זיין ביים סדר לימוד התורה דעם צווייטע טאג שבועות אינדערפרי דאס וועט זיין א אמת'דיגע הכנה צום אהבה רבה, און מעורר געווען מען זאל זיך אומקוקן אויף די חינוך פון די קינדער נישט צו שיקן ארבייטן אויף אום אויסגעהאלטענע פלעצער פאר מער געלט, אנטוהן ערליכע מלבושים, און דברי הכנה אויף די זומער וואכן נישט נאכלאזן נאר אדרבה מוסיף זיין בלימוד התורה, און דערמאנט דעם גזירות החינוך מען דארף האבן רחמי שמים, און מסיים געווען בברכות קדשו לכל העם הנאספים. מען האט געענדיגט ארום 8:20.

רעוא דרעווין

צו מנחה ושל"ש איז רבינו שליט''א אריינגעקומען אין ביהמ''ד ארום 8:50. מנחה: הרה''ח ר' דוד שמעון פראמאוויטש הי''ו, הוצאה והכנסה: ר' דוד ארי' קויפמאן הי''ו הי"ו, בעל קורא: הרה''ח ר' חיים העלער הי''ו. כהן: ר' יואל האפער הי''ו הי''ו, לוי: הרה''ח ר' בנצין אהרן ווערצבערגער הי''ו, שלישי: הרה''ג ר' שמעון יואל בראך שליט''א מו"ץ לעניני סת"ם קהלתינו בני ברק. הגבה: רבינו שליט"א, גלילה: הרה''ח ר' מרדכי שעהר הי''ו.

זמירות ביי של"ש האט רבינו שליט"א מכבד געווען. אודה: הרה''ח ר' יודל ווערצבערגער הי''ו, שיר המעלות: הרה"ח ר' מאיר שטערן הי"ו.

ביי די תורה האט זיך רבינו שליט"א געשטעלט אויפן פסוק ''אם בחוקותי תלכו'' און געטייטשט אז ווען דער אייבערשטער וועט העלפן דער גואל צדק וועט קומען ווען מען זוכה זיין צום אור נאר דורך צום ערשט עוסק זיין בתורה אין ביהמ''ד, ווי גרויס וועט זיין די בושה אז מען וועט איינעם נישט אריינלאזן אין ביהמ''ק ווייל ער האט נאכנישט גענוג עוסק געווען בתורה.

ידיד נפש: הרה''ח ר' מנחם גרשון לעבאוויטש הי''ו, קל מסתתר: הרה''ח ר' אביגדור פרענקל הי''ו. דער רבי שליט''א האט געבענטשט אויפן כוס.

צו מעריב מוצ"ש איז דער רבי צוגעגאנגען. נאך הבדלה איז מען אריבער זאגן א גוטע וואך, מען האט געענדיגט 11:05.

מוצש''ק ארום 12:15 איז רבינו שליט''א אריבער געגאנגן צו א כתיבת האותיות בבית הרה''ח ר' חיים יושע געלבשטיין הי''ו ראה''ק עצי חיים סיגוט.
אינעם נייעם ס"ת וואס ווערט אי"ה אריינגעגעבן נאך שבועות הבעל"ט בבית מדרשינו המפואר בנין געלבשטיין.
דער רבי האט אריינגעשריבן די אותיות, און א לענגערע שמועס האט זיך פארמירט מיט ר' חיים יהושע ובני משפחתו שיחי' בזכרונות מימי קדם, דערנאך האט דער רבי געטרינקן לחיים און ווארעם אנגעווינטשן הרה''ח ר' חיים יושע און די גאנצע משפחה. פון דארט איז רבינו שליט''א אהיים געפארן לביתו נאוה קודש בקרית יואל.

▫️ סאטמאר'ע נייעס 🌴 ▫️

דאנערשטאג פרשת בחוקתי 'בצל הקודש' פון כ''ק מרן רבינו הגה''ק שליט''א

אינדערפרי איידער תפילת שחרית איז פארגעקומען א ברית לבן הנולד לר' שלמה אהרן סופר הי''ו, ווי דער רבי איז געווען סנדק ומוהל.

רבינו שליט''א האט געדאווענט שחרית בהיכל המתיבתא סניף ברך משה. פארן דאווענען האט דער רבי געצינדן 5 ליכט לרגל די יומדהל"ק פון דודו הגה"ק רבי יקותיאל יהודה טייטלבוים זצ"ל הי"ד אב"ד סיגוט, ביים ליינען האט דער רבי עולה געווען שלישי. און נאכן דאווענען האט דער רבי פארגעלערנט דעם טעגליכן תהילים שיעור אויף קאפיטל י"ב פסוק א'.

פארנאכטס ארום 8:30 האט דער רבי געדאווענט מנחה בביתו נאוה קודש אויף איהעל קט. דערנאך איז געווען זמני כניסה בקודש פנימה ביז אום 12:15 אויפדערנאכט.

בעת די זמני כניסה איז געווען אויף א באזוך בקו''פ הגאון רבי צבי פריעדמאן שליט''א גאב''ד מסורות ונשיא מוסדות תפארת יעקב עטה''ק בארה"ק, עס האט זיך פארצויגן א שיינער שמועס און ער האט ארויסגעברענגט דעם געוואלדיגן חיזוק בגוף ובממון וואס מ'באקומט פון די תושבי קרית יואל, און איבער די געוואלדיגע פעולות לטובה פונעם וועד להצלת יהדות אוקריינע, ער האט געגעבן פאר רבינו שליט"א א מתנה זיין ספר 'חוקי דעה' אויף הלכות שמיטה, און דער רבי האט אים געגעבן א מתנה ספרו 'לב אהרן' אויף במדבר, דערנאך האט אים דער רבי מכבד געווען מיט לחיים און מאציל געווען מברכות קדשו.

אזוי אויך האבן זיך געשטעלט צום פארהער ביי רבינו שליט"א 'חבורת שערי טוהר' שע"י מבצר הכוללים אויף הלכות מקוואות, וועלכע שטייט בראשות חדב"ן הגה"צ רב דביהמ''ד אבני צדק שליט"א, ווי דער רבי האט פארהערט די חבורה פאר א לענגערע צייט.

רבינו שליט''א האט געליינט תנאים אין די תנאים זאל בביתו נאוה קודש פון די פאלגענגע מחותנים.
ר' שרגא פייש הערצאג הי''ו - ר' חיים נתן וויינשטאק הי''ו.
הר"ר חיים לייב זילבערשטיין שליט''א - ר' מענדל וואלף טייטלבוים הי''ו.

דער רבי האט געדאווענט מעריב ארום 12:15, און דערנאך צוגעגאנגען צום עמוד צו ספירה.

▫️ סאטמארע נייעס 🌴 ▫️

ווירקליכע אָפּהילעכונג ומעמד קידוש שם שמים היינטיגן דאנערשטאג, ווען רעקארד-צאל "הונדערט טויזנט" פאפירענע פעטיציעס ווערן האנט-דעליווערט דורך א חשובע דעלעגאציע פון שלוחי כלל ישראל, רבנים חשובים און ראשי עסקנים פונעם ''יונייטעד כלל ישראל'' פעטיציע-דרייוו, פאר'ן "עדיוקעישאן דעפארטמענט" אין די "אָלבאַני קאָרידאָרן". וואס האט אפגעשפילט כלל ישראל'ס פייערדיגע קעגנערשאפט צו די עדיוקעישאן-גיידליינס, אין אומגלויבליך ריזן אנשלוס, און האט געברענגט א צוזאמלויף פון הויכראנגיגע רעגירונגס פארשטייער אבזערווירן שטוינענדע ספעקטאקל מיט שפראכלאזע וואונדער פון אזא ריזן צאל פעטיציעס וואס ברעכט היסטאריע אין שטאט ניו יארק.

איינדרוקסרייכע סענזאציע ווען דעלעגאציע שטעלט זיך פארנט פון בנין ביים איבערגעבן די פעטיציעס פון צענדליגער קעסטלעך, אויפטרייבנדיג אנלויף פון פרעסע לייט. עס האבן אויפגעטרעטן הרב אשר שוואב שליט"א ראש ישיבה דגל התורה מאנסי, העסקן הרב בנצין ווידער הי''ו, און הרב יעקב שפירא שליט"א רב דקהל אור אביגדור בעיסוואטער האט אויסגערופן די פעטיציע-מעסעדזש.


תם ולא נשלם!
בלויז געציילטע טעג פארבליבן צום דעדליין, און ס'איז קריטישע טעג ביי ניו יארקער אידנטום, פרישע מחנות עסקנים זענען דעזיגנירט געווארן פאר אלע היימישע געגנטער צו אנשליסן "יעדן איינציגן" איד צו שרייבן בריוו פאר די רעגירונג אז מיר טוען נישט טאלערירן די נייע גיידליינס, מיר רירן זיך נישט אוועק פון די מסורה, בדרך אבותינו ורבותינו נלך, ומנה לא נזוע!

דרוקט "יעצט" דא און שרייבט אונטער.

https://unitedklalyisrael.org/#/


▫️ סאטמאר'ע נייעס 🌴 ▫️

מיטוואך פרשת בחוקתי 'בצל הקודש' פון כ''ק מרן רבינו הגה''ק שליט''א

רבינו שליט''א האט געדאווענט שחרית בהיכל המתיבתא סניף ויואל משה. פארן דאווענען האט דער רבי תפילין געלייגט פאר די בר מצוה בחורים:
בן הרה"ג ר' יואל גוטמאן שליט"א מו"ץ בקהלתינו הק'.
ב"ר יואל מייזליש הי''ו.

נאכן דאווענען האט דער רבי פארגעלערנט דעם טעגליכן תהילים שיעור אויף קאפיטל י"ב פסוק א'. דערנאך איז פארגעקומען א לחיים מיט די בר מצוה בחורים בחדרו הפרטי.

אין די פארמיטאג שעה'ן איז געווען אויף א באזוך בקודש פנימה בביתו נאוה קודש הרה"צ ר' אברהם מרדכי אלתר שליט"א בן כ"ק אדמו"ר מגור שליט"א, עס האט זיך פארמירט א שיינע שמועס, און דער רבי האט אים מאציל געווען מברכות קדשו, און געשיקט א פריסת שלום פאר כ"ק אדמו"ר מגור שליט"א.

נאכמיטאג איז דער רבי ארויף בהיכל הישיבה סניף דברי יואל ווי דער רבי האט געלערנט מיט א חברותא מתלמידי הישיבה בחדרו הפרטי.

פארנאכטס ארום 8:30 האט דער רבי געדאווענט מנחה בביתו נאוה קודש אויף איהעל קט. דערנאך איז געווען זמני כניסה בקודש פנימה ביז אום 1:15 אויפדערנאכט.

בעת די זמני כניסה זענען אריין בקודש פנימה די עסקנים פונעם "כינוס נשי כלל ישראל" קעגן פגעי טעכנעלאגיע וועלכע איז אין פלאן אויף די קומענדיגע וואכן נאך שבועות, מ'האט אויסגעשמועסט אלע פלענער און פרטים פון די אסיפה, און דער רבי האט מאציל געווען מברכת קדשו.

רבינו שליט''א האט געליינט תנאים אין די תנאים זאל בביתו נאוה קודש פון די פאלגענדע מחותנים.
ר' זאב אלעזר רייכמאן הי''ו - הר"ר אברהם הערש זאלדאן שליט''א.
ר' יושע הערש גליק הי''ו - הר''ר שמואל אפרים גאלד שליט''א.

דערנאך איז פארגעקומען א מסיבת לחיים בביהמ''ד שע''י ביתו נאוה קודש פאר די עסקנים פונעם ''כלל ישראל קאמפיין'' להצלת חינוך הטהור בניו יארק, אלס אות הכרת הטוב פאר די איבערגעגעבענע ארבייט צו שאפן די צענדליגער טויזענטער פעטיציע'ס, ווען אויפן פלאץ אליינס איז געווען די נאנט צו הונדערט טויזענט פעטיציע'ס וואס די געטרייע עסקנים זענען שוין אראפגעפארן היינט דאנערשטאג עס איבערגעבן פאר די רעגירונג אינסטאנצן אין אלבאני.

דער רבי האט זיך אומגעקוקט מיט א שטארקע קורת רוח אויף די טויזענטער פעטיציע'ס, און דערנאך געטרינקן לחיים און מאציל געווען מברכת קדשו פאר אלע עסקנים ובראשם די רוח החיים פונעם פעטיציע דרייוו העסקן הרה''ח ר' שלמה מנשה פאלקאוויטש הי''ו און הרה''ח ר' אהרן יוסף פריעדמאן הי''ו, דער רבי האט ארויסגעברענגט די וויכטיגקייט פון די פעטיציעס, און די גוטע השפעה וואס דאס קען בס''ד אויפטוהן אין די הויכע פאליטישע קארידארן, און אויב עס וועט אויספעלן, אויך אין געריכט. און דערביי געוואונטשן 'ותטע לב המלכות עלינו לטובה'.

שפעטער האט מען ממשיך געווען מיט די מסיבה ווי עס האט אויפגעטרעטן העסקן הרה''ח ר' שלמה מנשה פאלקאוויטש הי''ו וועלכע האט ארויסגעברענגט רגשי לבבו נאכן אנקומען צו די ריזיגע ציפערן מער ווי געראכטן, דערנאך האבן אויפגעטרעטן העסקן הגדול ר' אהרן בנציון ווידער הי''ו און הרב משה שוואב שליט"א ראש ישיבת דגל התורה מאנסי.

נאך די מסיבה זענען אריין בקודש פנימה די ראשי עסקנים ובראשם העסקן ר' אהרן בנציון ווידער הי''ו און הרב משה שוואב שליט"א ראש ישיבת דגל התורה מאנסי, ווי זיי זענען איבערגעגאנגען מיטן רבי'ן די ווייטערדיגע פלענער לדורן ולתפילה ולמלחמה למען הצלת החינוך אין ניו יארק.

רבינו שליט''א האט געדאווענט מעריב ארום 12:40, פאר מעריב האט דער רבי געצינדן 5 ליכט לרגל די יומדהל"ק פון דודו הרה"ק רבי יקותיאל יהודה טייטלבוים זצ"ל הי"ד אב"ד סיגוט, און נאך מעריב צוגעגאנגען צום עמוד צו ספירה.

▫️ סאטמאר'ע נייעס 🌴 ▫️

דינסטאג פרשת בחוקתי 'בצל הקודש' פון כ"ק מרן רבינו הגה"ק שליט"א

רבינו שליט"א האט געדאווענט שחרית בביהמ"ד רב טוב אינאיינעם מיט תלמידי ישיבה גדולה 'עסק התורה' פון ביידע סניפים. פארן דאווענען האט דער רבי תפילין געלייגט פאר די בר מצוה בחורים:
ב"ר חיים הערש קאהן הי"ו.
ב"ר יוסף לייב אלימלך וועצבערגער הי"ו.
ב"ר יואל ברי"מ לאנדא הי"ו.

נאכן דאווענען האט דער רבי משמיע געווען קורצע דברות קודש ודברי חיזוק פאר די בחורים. דערנאך איז פארגעקומען א לחיים מיט די בר מצוה בחורים בחדרו הפרטי.

פון דארט איז דער רבי געגאנגן אויף א באזוך אינעם בנין ת"ת החדש 'בנין קליין' ווי דער רבי האט זיך אומגעקוקט אויף די פארשריט ביי די בוי ארבייט, א לענגערע צייט.

נאכמיטאג ארום 6:15 האט דער רבי געדאווענט מנחה בביתו נאוה קודש.

אים 8:15 איז רבינו שליט''א אנגעקומען קיין וומסב''ג און איז געווען מנחם אבל זיין משפחת רובין ע"פ אמם ע"ה. דערנאך איז געווען זמני כניסה בקודש פנימה ביז אום 12:45 אויפדערנאכט בביתו נאוה קודש בוומסב''ג.

בעת די זמני כניסה איז פארגעקומען א סיום כתיבת ספר תורה וואס ווערט געשריבן דורך משפחת האלצמאן הי"ו לע"נ זייער פאטער ע"ה, דער רבי האט אריינגעשריבן די אותיות און דערנאך געטרינקן לחיים און מאציל געווען מברכות קדשו.

שפעטער איז געווען נאך א סיום כתיבת האותיות פון די ספר תורה וואס ווערט געשריבן דורך הרה''ח ר' אביגדור שלעזינגער הי''ו דער רבי האט אריינגעשריבן די אותיות און דערנאך געטרינקן לחיים און מאציל געווען מברכות קדשו.

דער רבי האט געדאווענט מעריב ארום 11:30, און נאך מעריב צוגעגאנגען צום עמוד צו ספירה, און דערנאך ווײטער ממשיך געווען אויפצונעמען דעם ציבור.

▫️ סאטמאר'ע נייעס 🌴 ▫️

מאנטאג פרשת בחוקתי 'בצל הקודש' פון כ''ק מרן רבינו הגה''ק שליט''א

רבינו שליט''א האט געדאווענט שחרית בהיכל המתיבתא סניף דברי יואל. פארן דאווענען האט דער רבי תפילין געלייגט פארן בר מצוה בחור ב''ר משה הלל ראזענבערג הי''ו.

ביים ליינען איז דער רבי געגאנגען הגבה. נאכן דאווענען האט דער רבי פארגעלערנט דעם טעגליכן תהילים שיעור אויף קאפיטל י"א פסוק ה'. און ס'איז פארגעקומען א לחיים מיטן בר מצוה בחור בחדרו הפרטי.

נאכמיטאג איז רבינו שליט"א ארויף בהיכל הישיבה סניף דברי יואל ווי דער רבי האט געלערנט מיט א חברותא מתלמידי הישיבה בחדרו הפרטי. און אום 6:15 האט דער רבי געדאווענט מנחה אין ישיבה.

אויפדערנאכט ארום 7:45 איז רבינו שליט''א ארויסגעפארן קיין בארא פארק ווי דער רבי האט צום ערשט מנחם אבל געווען די משפחה פון כ"ק אדמו"ר מכוונת הלב זצ"ל.

פון דארט איז דער רבי אריבער צום נייעם פראכטפולען רחבות'דיגער לאקאל פון 'סאטמאר פלייש געשעפט' דקהלתינו הק' אויף 13עוו. און 44'סט. דער רבי האט זיך אומגעקוקט אויף אלע אפטיילונגען פון געשעפט, און דערנאך אריבער צו די גיגאנטישע קאך ווי עס וועט אי"ה ווערן אנגעגרייט די מאכלים פונעם געשעפט און עווענטועל אויך פאר די כרם מנחם זאלן אין שטאט, דער רבי האט באוואונדערט די ארבייט וואס מ'האט אריינגעלייגט אהערצושטעלן דעם געשעפט ברוב פאר והדר, און מאציל געווען מברכות קדשו פאר אלע ממונים ובפרט פאר'ן רוח החיים פונעם פראיעקט ר' יואל ברמ"ד לאנדא הי"ו.

דערנאך איז דער רבי געווען אויף א באזוך ביי כ"ק האדמו"ר מבית חיים יושע שליט"א, ווי עס האט זיך פארצויגן א שיינע בסיפורי צדיקים לבית אבותיהם הק' צאנז און סיגוט. האדמו"ר מבית חיים יושע שליט"א האט מכבד געווען דעם רבי'ן מיט לחיים און דער רבי האט מאציל געווען מברכות קדשו.

פון דארט איז דער רבי צוגעפארן צום כינוס רבתי "מסורתינו" פאר אלפי אנ''ש תושבי בארא פארק למען עתיד דורותינו, אין די זאלן פון די פעלעס, דער רבי איז אריינגעקומען בערך 10:20 און הגה"צ רב דביהמ"ד ישמח משה שליט''א, חדב"נ האט דערווייל ממשיך געווען מיט זיין דרשה, דערנאך האט דער יו''ר המעמד הרה''ג ר' עקיבא יוסף כהנא שליט"א מנהל כתה ט' מכינה לישיבה אויסגערופן הגה"צ רבי צבי אלימלך טייטלבוים שליט"א רב דביהמ"ד תפילה למשה דקהלתינו הק' וועלכע האט פארגעליינט די תקנות ויסודות הדת פון קהלתינו ומוסדותינו הק' וועלכע זענען באשטעטיגט געווארן און אינטערגעשריבן געווארן דורך כ"ק מרן רבינו שליט"א.

בערך 11 אזייגער האט רבינו שליט''א משמיע געווען דברות קודש און לענגערע דברי הדרכה זיך צו האלטן צו די מסורת האבות און ח"ו נישט משנה זיין, דאווענען און לערנען אין די היימישע בתי מדרשים ווי די טאטעס פלעגן דאווענען, און מעורר געווען אז עס איז דא צוויי מחנות, די מחנה אלקים און די מחנה המגושמים, ב"ה אז רוב ציבור באשטייט פונעם מחנה אלקים אבער מען דארף זען דאס אנצוהאלטן, און דאס קען נאר זיין ווען מען האלט איין די תקנות פון מוסדותינו הק', און דורכן האבן שיעורי תורה בקביעות, און דער רבי האט מעורר געוועהן דעם ציבור איינצוהאלטן די תקנות בעניני צניעות, כשרות, כלים הטמאים, וכו', און מסיים געווען בברכת קדשו פארן גאנצן ציבור. מען האט געענדיגט ארום 11:45.

דערנאך האט דער רבי געדאווענט מעריב אינעם זאל, בעל תפילה: הרה"ח ר' יואל ברי"ה פריעדמאן הי''ו, און נאך מעריב איז דער רבי צוגעגאנגען צום עמוד צו ספירה.

אום 12:15 איז דער רבי צוגעפארן צום ביהמ"ד החדש ע''ש הרה"ק מהרש"א מראצפערט בארא פארק יצ"ו, בראשות נכדו הרב חיים הערש טייטלבוים שליט"א, דער רבי האט זיך אומגעקוקט אויפן ביהמ''ד און קובע געווען א מזוזה, און דערנאך געטרינקן לחיים און ווארעם אנגעווינטשן פארן רב הביהמ"ד און פארן גאנצן ציבור, עקסטער האט דער רבי אנגעווינטשן פארן בעה"ב הרה"ח ר' הערשל איינהארן הי''ו. און ארום 12:30 האט זיך דער רבי ארויסגעלאזט אויפן וועג אהיים לביתו נאוה קודש אין קרית יואל.

▫️ סאטמאר'ע נייעס 🌴 ▫️

זונטאג פרשת בחוקתי 'בצל הקודש' פון כ''ק מרן רבינו הגה''ק שליט''א

רבינו שליט''א האט געדאווענט שחרית בהיכל המתיבתא סניף קדושת יואל. פארן דאווענען האט דער רבי געלייגט תפילין פאר די בר מצוה בחורים:
בן הרה''ג ר' יוסף שלמה פייערשטיין שליט''א.
ב''ר יעקב מרדכי טייטלבוים הי''ו.
ב''ר פנחס אלימלך ווייסמאן הי''ו.
ב''ר יעקב שטערן הי''ו.
ב''ר אהרן זילבערשטיין הי''ו.
ב''ר יצחק יחזקאל דוד קרויס הי''ו.
תאומים בני הר''ר יואל שלעזינגער שליט''א.
ב''ר חיים הערש גאלדבערגער הי''ו.

נאכן דאווענען האט דער רבי פארגעלערנט דעם טעגליכן תהלים שיעור אויף קאפיטל י"ב פסוק ב'. דערנאך איז פארגעקומען א לחיים מיט די בר מצוה בחורים בהיכל הביהמ''ד.

אין די פארמיטאג שעה'ן איז דער רבי געווען אויף די וועכענטליכע באזוך אינעם בית השחיטה המהודרת.

פארנאכטס ארום 8:30 האט דער רבי געדאווענט מנחה בביתו נאוה קודש אויף איהעל קט. דערנאך איז געווען זמני כניסה בקודש פנימה ביז אום 12:30 אויפדערנאכט.

רבינו שליט''א האט געליינט תנאים אין די תנאים זאל בביתו נאוה קודש פון די מחותנים ר' יעקב ברי"מ פריעדמאן הי''ו - ר' אביגדור מאיר סאמעט הי''ו.

רבינו שליט''א האט געדאווענט מעריב ארום 12:30 בביתו נאוה קודש און דערנאך צוגעגאנגען צום עמוד צו ספירה.

▫️ סאטמאר'ע נייעס 🌴 ▫️