Satmara Niyes

פרייטאג ערש''ק חקת 'בצל הקודש' פון כ''ק רבינו הגה''ק שליט''א

אינדערפרי איידער תפילת שחרית איז פארגעקומען א ברית לבן הנולד אצל ר' חיים שלמה פארקאש הי"ו, ווי דער רבי איז געווען סנדק ומוהל.

רבינו שליט''א האט געדאווענט שחרית אין בנין הת"ת 'בנין הירש ג"ב לאנדא' אינאיינעם מיט די תלמידי כתה ט' סניף הר"ר יואל שפיטצער שליט"א. פארן דאווענען האט דער רבי געלייגט תפילין פאר די בר מצוה בחורים.
בן הרה"ג ר' אפרים פישל בערקאוויטש שליט"א מו"ץ.
ב"ר ישראל יעקב ווייס הי"ו.

נאכן דאווענען איז פארגעקומען א מסיבת לחיים בהיכל הביהמ"ד, מען האט געזינגען עטליכע ניגונים און חרוזים לכבוד המאורע, דער רבי האט געטרינקן לחיים און אנגעוואונטשן פאר די בר מצוה בחורים און פאר אלע בחורים און מרביצי תורה, און משמיע געווען דב"ק אויפן פסוק 'על כן יאמרו הגוים באו חשבון' און ארויסגעברענגט אז די איינציגסטע וועג בייצוקומען דעם יצר הרע איז נאר מיט די תורה הקדושה, און געזאגט אז אין די יעצטיגע וואכן איז די צייט צו מאכן די חשבון און צו חזר'ן די בלעטער פון מסכת קידושין מען זאל קענען סוף יאר מסיים זיין די גאנצע מסכת, און ממשיך געווען בדברי הדרכה און מסיים געווען בברכת קדשו.

▫️ סאטמאר'ע נייעס 🌴 ▫️

דאנערשטאג פרשת חקת 'בצל הקודש' פון כ''ק רבינו הגה''ק שליט''א

אינדערפרי איידער תפילת שחרית איז פארגעקומען א ברית לבן הנולד אצל ר' ארי' פריעדלענדער הי"ו, ווי דער רבי איז געווען סנדק ומוהל.

דער רבי האט געדאווענט שחרית בהיכל המתיבתא סניף ברך משה. פארן דאווענען האט דער רבי געלייגט תפילין פאר די בר מצוה בחורים.
ב"ר יואל ברמ"א גראס הי"ו.
ב"ר יואל יצחק מאטצען הי"ו.
ב"ר בעריש מויזקאפף הי"ו.

ביים ליינען איז דער רבי געגאנגען הגבה, און נאכן דאווענען פארגעלערנט א שיעור סוגיא בשיעורי הישיבה. דערנאך איז פארגעקומען א לחיים מיט די בר מצוה בחורים בחדרו הפרטי.

נאך שחרית ארום 12:30 איז דער רבי ארויף פוקד זיין די ציונים פון רבותינו הק', ביים אנקומען אין בית החיים האט דער רבי געמאכט די ברכה. דער רבי האט געצינדען 5 ליכט ביי די ציונים פון רבותינו הק' בעל דברי יואל ובעל ברך משה זיע''א און ביי ציון אמו הרבנית ע"ה, דערנאך האט דער רבי געזאגט די תפילה פונעם ישמח משה זיע"א און פארגעזאגט ספר רביעי מיט א שטארקע התעוררות ובבכיות און געזאגט קדיש, און דערנאך געליינט קוויטלעך א לענגערע צייט, בשעת מען האט געזינגען ניגוני התעורורות, דערנאך האט זיך דער רבי משתטח געווען אויף די ציונים פון רבותינו הק' און פון אמו הרבנית ע"ה. מען האט געענדיגט ארום 1:20.

אין די נאכמיטאג שעה'ן איז אריין בקו''פ בביתו נאוה קודש הנגיד הטפסר ר' ראובן שרון הי"ו פון פלעטבוש, ווי ער האט געברענגט זיין ברייטע נדבה לטובת די צדקה וחסד פראיעקטן פון הרבנית הצ' תחי', עס האט זיך פארמירט א שיינע שמועס איבער זיינע פילע פעולות בעניני הכלל, און דער רבי האט אים מאציל געווען מברכות קדשו און זיך באדאנקט פאר זיינע גרויסע נדבות למען הכלל והפרט.

פארנאכטס האט דער רבי מסדר קידושין געווען ביי די חופה פון די מחותנים הרה"ח ר' יודא שלמה פריעדמאן הי"ו - הרה"ח ר' אברהם ווייסמאן הי"ו, באולם כינור דוד.

נאך די חופות איז דער רבי אריבער אין שטוב פון הרה"ח ר' משה נתן פישער הי"ו לרפו"ש אויף ביקור חולים, ווי עס איז פארגעקומען א שבע ברכות לרגל נישואי נכדו למז"ט החתן בן לחתנו הרה"ח ר' שמואל אהרן זינגער הי"ו, עס האט זיך פארצויגן א שיינע שמועס, דער רבי האט געטרינקען לחיים און מאציל געווען מברכות קדשו.

ארום 9:00 האט דער רבי געדאווענט מנחה בביתו נאוה קודש אויף איהעל קט.
דערנאך איז געווען זמני כניסה בקו''פ ביז 12:45 אויפדערנאכט.

בעת די זמני כניסה זענען אריין בקו''פ תלמידי ישיבה נחלת התורה פון לעיקוואד בהנהלת הר"ר שלמה יצחק גרויסמאן שליט"א, דער רבי האט פארהערט די לימודים און די בחורים זענען אריבער מקבל זיין ברכת הקודש.

רבינו שליט''א האט געליינט תנאים אין די תנאים זאל בביתו נאוה נישט פון די מחותנים הרה"ח ר' זלמן לייב שפילמאן הי"ו - הרה"ח ר' אברהם שמואל שווארטץ הי"ו.

דער רבי האט געדאווענט מעריב ארום 12:45.

▫️ סאטמארע נייעס 🌴 ▫️

מיטוואך פרשת חקת 'בצל הקודש' פון כ''ק רבינו הגה''ק שליט''א

דער רבי האט געדאווענט שחרית בהיכל המתיבתא סניף ויואל משה. פארן דאווענען האט דער רבי געלייגט תפילין פאר די בר מצוה בחורים.
ב"ר שמעון שווארץ הי"ו.
ב"ר שמואל לאנדא הי"ו.

נאכן דאווענען האט דער רבי פארגעלערנט דעם טעגליכן תהילים שיעור אויף קאפיטל כ"ב פסוק א'. דערנאך איז פארגעקומען א לחיים מיט די בר מצוה בחורים בחדרו הפרטי.

נאכמיטאג איז דער רבי ארויף בהיכל הישיבה סניף קדושת יואל ווי דער רבי האט געלערנט מיט א חברותא מתלמידי הישיבה בחדרו הפרטי.

פארנאכטס האט דער רבי מסדר קידושין געווען ביי די חופה פון די פאלגענדע מחותנים.
הרה"ח ר' ישראל שמחה לאנדא הי''ו - הרה"ח ר' אלחנן טויב הי"ו, באולם כינור דוד.
הרה"ח ר' יצחק אליקים שווארטץ הי"ו - הרה"ח ר' יוחנן מאנן הי"ו, באולם בית רחל פאראדייס.

זמני כניסה בקו''פ איז געווען פון 8:00 ביז 11:50 אויפדערנאכט, בביתו נאוה קודש אויף איהעל קט.

דער רבי האט געדאווענט מנחה ארום 9:00, און מעריב ארום 11:50 בביתו נאוה קודש.

▫️ סאטמארע נייעס 🌴 ▫️

דינסטאג פרשת חקת 'בצל הקודש' פון כ''ק רבינו הגה''ק שליט''א

אינדערפרי איידער תפילת שחרית איז פארגעקומען די ברית'ן:
לבן הנולד אצל ר' מענדל משה פילאפף הי"ו, ווי דער רבי איז געווען סנדק ומוהל.
לבן הנולד אצל ר' יואל וויזעל הי"ו, ווי דער רבי איז געווען סנדק ומוהל.

דער רבי האט געדאווענט שחרית אין ישיבה גדולה סניף עצי חיים שיעור ג'. נאכן דאווענען האט דער רבי פארגעלערנט דעם טעגליכן תהילים שיעור אויף קאפיטל כ"א פסוק ב'.

אין די פארמיטאג שעה'ן איז דער רבי געווען אויף די וועכענטליכע באזוך אינעם בית השחיטה המהודרת.

נאכמיטאג איז דער רבי ארויף בהיכל הישיבה סניף ברך משה ווי דער רבי האט געלערנט מיט א חברותא בחדרו הפרטי. און ארום 6:15 האט דער רבי געדאווענט מנחה אין ישיבה.

פארנאכטס איז דער רבי אריינגעפארן קיין וומסב''ג צו די וועכענטליכע זמני כניסה.

ביים אנקומען אין וומסב''ג האט דער רבי מנחם אבל געווען משפחת הגה"צ רבי שמעי' גרינבוים זצ"ל בעל מחבר ספרי סייעתא דשמיא.

זמני כניסה בקו''פ איז געווען פון 8:30 ביז 11:30 אויפדערנאכט, בביתו נאוה קודש אויף היוז סט.

דער רבי האט געדאווענט מעריב ארום 10:00, און דערנאך ווייטער ממשיך געווען אויפנעמען דעם ציבור.

▫️ סאטמארע נייעס 🌴 ▫️

מאנטאג פרשת חקת 'בצל הקודש' פון כ''ק רבינו הגה''ק שליט''א

דער רבי האט געדאווענט שחרית בהיכל המתיבתא סניף דברי יואל. פארן דאווענען האט דער רבי געלייגט תפילין פאר די בר מצוה בחורים.
ב"ר מרדכי סטרולאוויטש הי"ו.
ב"ר משה נתן גרינפעלד הי"ו.
ביים ליינען איז דער רבי געגאנגען הגבה, און נאכן דאווענען פארגעלערנט דעם טעגליכן תהילים שיעור אויף קאפיטל כ"א פסוק ב'. דערנאך איז פארגעקומען א לחיים מיט די בר מצוה בחורים בחדרו הפרטי.

אין די פארמיטאג שעה'ן זענען אריין בקו''פ בביתו נאוה קודש תלמידי ת"ת שאגת אריה פון לעיקוואד בהנהלת הר"ר בנימין באש שליט"א, דער רבי האט פארהערט די לימודים און מאציל געווען מברכת קדשו.

נאכמיטאג איז דער רבי ארויף בהיכל הישיבה סניף ברך משה ווי דער רבי האט געלערנט מיט א חברותא מתלמידי הישיבה בחדרו הפרטי.

פארנאכטס האט דער רבי מסדר קידושין געווען ביי די חופה פון די פאלגענדע מחותנים.
הרה"ח ר' שמואל אהרן זינגער הי"ו - הרה"ח ר' יצחק אייזיק קרויס הי"ו, באולם כינור דוד.
הרה"ח ר' זלמן לייב שטערן הי"ו - הרה"ח ר' הערש אלימלך ברא"י ווערצבערגער הי"ו, באולם בית רחל פאראדייס.
הרה"ח ר' דוד יואל הערשקאוויטש הי"ו - הרה"ח ר' חיים נחום לעבאוויטש הי"ו, באולם קרן ויואל משה.

זמני כניסה בקו''פ איז געווען פון 8:10 ביז 12:40 אויפדערנאכט, בביתו נאוה קודש אויף איהעל קט.

ארום 9:15 האט דער רבי געדאווענט מנחה בביתו נאוה קודש.

רבינו שליט''א האט געליינט תנאים אין די תנאים זאל בביתו נאוה קודש פון די מחותנים הרה"ח ר' איתמר טובי' בר"ש ווידער הי"ו - הרה"ח ר' יואל בר"מ ווערטהיימער הי"ו.

דער רבי האט געדאווענט מעריב ארום 12:40.

▫️ סאטמארע נייעס 🌴 ▫️

זונטאג חקת ב' דר"ח תמוז 'בצל הקודש' פון כ''ק רבינו הגה''ק שליט''א

אינדערפרי איידער תפילת שחרית איז פארגעקומען די ברית'ן:
לבן הנולד אצל ר' שלמה מנשה בר"י פאלקאוויטש הי"ו, ווי דער רבי איז געווען סנדק ומוהל.
לבן הנולד אצל ר' חיים ברי"מ פריעדמאן הי"ו, ווי דער רבי איז געווען סנדק.

רבינו שליט''א האט געדאווענט שחרית בהיכל המתיבתא סניף קדושת יואל. פארן דאווענען האט דער רבי געלייגט תפילין פאר די בר מצוה בחורים.
ב"ר משה יחיאל יודא מענדלאוויטש הי"ו.
ב"ר יצחק משה ווייס הי"ו.
ב"ר יואל שאלאמאן הי"ו.
דער רבי איז צוגעגאנגען צו הלל און ביים ליינען עולה געווען רביעי.
נאכן דאווענען איז פארגעקומען א לחיים מיט די בר מצוה בחורים בחדרו הפרטי.

נאכמיטאג איז דער רבי ארויף בהיכל הישיבה סניף ויואל משה ווי דער רבי האט געלערנט מיט א חברותא בחדרו הפרטי. און ארום 5:40 האט דער רבי געדאווענט מנחה אין ישיבה.

ארום 6:15 איז דער רבי אריבער צו די מסע הלויה פון הגה"צ חו"פ ר' שמעי' גרינבוים זצ"ל בעל מחבר ספרי סייעתא דשמיא, וואס איז פארגעקומען פארנט פון ביהמ"ד הגדול במעמד אלפי אנ''ש, ובפקודת הקודש פון רבינו שליט"א האבן זיך אויך משתתף געווען ביים לויה די תלמידי הישיבה.
עס האבן מספיד געווען דורך א הוקאפ הגאון האדיר רבי אליקים שלעזינגער שליט"א ראש ישיבת הרמה לאנדאן, הגאון הגדול דומ"ץ קרית יואל שליט"א, תלמידו הר"ר יצחק אליעזר וואלדמאן שליט"א, חתנו הרה"ג ר' אהרן יוסף ראזענבוים שליט"א.
דערנאך האט דער רבי משמיע געווען דברי הספד בקול בכי און באוויינט די אבידה שאין לה תמורה, און ארויסגעברענגט זיין דביקות אין רבותינו הק' בעל דברי יואל ובעל ברך משה זיע''א זייענדיג דער שליח נאמן צו משמיע זיין משנתו הטהורה פון רביה"ק זיע''א איבער דעם חומר הענין פון די בחירות הטמאות פאר די אידן אין ארה"ק, און איבער זיין געוואלדיגע פירוש אויף משניות צו ברענגן די משניות לידי הבנה פאר יעדן איד. דער רבי האט געזאגט אז רבינו הקדוש מסדר המשניות איז אים זיכער מחזיק טובה, און געבעטן פונעם חשוב'ן נפטר צו זיין א מליץ יושר פאר זיין גאנצע משפחה און פאר גאנץ כלל ישראל.
דערנאך האט מספיד געווען דורך א הוקאפ פון ארה"ק כ"ק פוסק הדור ומרא דארעא קדישא שליט"א, און דערנאך האט דער רבי מלוה געווען די מטה אינאיינעם מיטן גאנצן ציבור פאר א שטיק צייט און דערנאך אהיים געגאנגן לביתו נאוה קודש.

פארנאכטס האט דער רבי מסדר קידושין געווען ביי די חופה פון די פאלגענדע מחותנים.
הרה"ג ר' יצחק שלום פריעדמאן שליט"א מו"ץ, - הרה"ח ר' שלמה זלמן ווייס הי"ו, באולם כינור דוד.
הרה"ח ר' שמואל לייב פריעד הי"ו - הר''ר דוד ליכטענשטיין שליט"א, באולם בית רחל פאראדייס.

נאך די חופות האט דער רבי מנחם אבל געווען ר' יואל ברי"פ ווייס הי"ו - וומ"ס, ע"פ בנו ע"ה.

זמני כניסה בקו''פ איז געווען פון 8:15 ביז 11:45 אויפדערנאכט, בביתו נאוה קודש אויף איהעל קט.

רבינו שליט''א האט געליינט תנאים אין די תנאים זאל בביתו נאוה קודש פון די מחותנים הר"ר זלמן לייב ברח"ב פילאפף שליט"א - הרה"ח ר' וואלף ליכטענשטיין הי"ו.

נאך די תנאים האט דער רבי געדאווענט מעריב און דערנאך ווייטער ממשיך געווען אויפנעמען דעם ציבור.

▫ סאטמאר'ע נייעס 🌴▫

שב''ק פרשת קרח ר"ח תמוז 'בצל הקודש' פון כ''ק רבינו הגה''ק שליט''א

פארן זמן הדלקה"נ האט דער רבי אנגעטוהן דעם שטריימל פאר די חתנים.
החתן חיים שלמה ב"ר שמואל אהרן זינגער הי"ו.
החתן מרדכי אפרים פישל ב"ר ישראל שמחה לאנדא הי"ו.
החתן יושע בן הרה"ג ר' יצחק שלום פריעדמאן שליט"א.

פרייטאג צונאכטס ארום 9:05 איז דער רבי אריינגעקומען אין ביהמ''ד מעוטף בטליתו און צוגעגאנגען צו מנחה, קבלת שבת: הרה"ח ר' יוחנן מאנן הי"ו.
מען האט געענדיגט דאווענען ארום 10:40. דער ציבור איז אריבער זאגן גוט שבת און דער רבי איז אריין לחדרו הפרטי.

ארום 11:10 איז דער רבי אריינגעקומען צום שלחן הטהור בהיכל השלחנות אינאיינעם מיט די תלמידי המתיבתא, און אנגעהויבן כדרכו בקודש שלום עליכם ברגש ובנעימה.
אשת חיל: נכד רבינו הב' ישכר בער ט"ב ני"ו בן חדב"ן הגה"צ רב דביהמ"ד ברך משה שליט"א, הגבהת הכוס: נכד רבינו הרב מאיר יודא אשכנזי שליט"א חתן חדב"ן הגה"צ רב דביהמ"ד אבני צדק שליט"א.

מיט די זמירות האט רבינו שליט''א מכבד געווען. כל מקדש: הר"ר יושע אייזען הי"ו (וומסב''ג), מנוחה ושמחה: הרה"ג ר' חיים יעקב סאפרין שליט"א רב דביהמ"ד קאמארנא בירושלים.

רבינו שליט''א האט געזאגט תורה אויפן פסוק 'ויקח קרח' און געטייטשט בדרך דרוש אין די סוגיא פון אין עשה דוחה לא תעשה שבמקדש, און אויף נאך א אופן בדרך אגדה אז די מחלוקה צווישן קרח מיט משה רבינו איז געווען צו עס ניצט תשובה אויפן חטא העגל.

קה אכסוף: הרב אלכסנדר אשר באב"ד שליט"א (ב"פ), ברכת המזון: הרה"צ ר' אברהם עקשטיין שליט"א אב"ד באונעס איירעס.

עובדות וסיפורים די וואך האט רבינו שליט''א דערציילט פון הגה''ק רבי יושע העשיל מקאמארנא זצ"ל בן הגה"ק הברוך טעם זיע''א וואס די יארצייט געפאלט מיטוואך ד' תמוז.

קה רבון עלם: הרה"ח ר' גדלי' עפשטיין הי"ו (בראכפעלד), די פרישע חתנים זענען אריבער נעמען פירות. אז ביום השביעי: הרה"ח ר' יוסף בר"ח יאקאב הי"ו. מען האט געענדיגט ארום 1:50.

וביום השבת קודש

שב''ק אינדערפרי איז דער רבי אריינגעקומען אין ביהמ''ד ארום 9:40. ברכות ופסוקי דזמרה: הרה"ח ר' ישראל שמחה לאנדא הי"ו, צו שחרית והלל איז דער רבי צוגעגאנגען.

הוצאה והכנסה: הרה"ח ר' חיים אלי' טייטלבוים הי"ו און הרה"ח ר' יצחק זינגער הי"ו (וומסב''ג), פסוקי שמע ישראל: הגה"צ ר' מאיר צוויבל שליט"א מרבני קהלתינו הק' בוומסב''ג.

עליות. כהן: החתן הערשל ב"ר יצחק אליקים שווארטץ הי"ו - באווארפען. לוי: החתן מרדכי אפרים פישל ב"ר ישראל שמחה לאנדא הי"ו - באווארפען. שלישי: החתן חיים שלמה ב"ר שמואל אהרן זינגער הי"ו - באווארפען. רביעי: החתן יושע בן הרה"ג ר' יצחק שלום פריעדמאן שליט"א - באווארפען. חמישי: הרה"ח ר' שאול לייב זאלדאן הי"ו. שישי: רבינו שליט''א.

נאכ'ן עולה זײן האט דער רבי קורא שם געווען לרגל הולדת הבת אצל:
ר' שמואל וואלף לעווי הי"ו (וומסב''ג).
ר' שלמה אהרן פריעדמאן הי"ו.
ר' שמעון גאלדבערגער הי"ו.
ר' שמואל שטיינבערג הי"ו.
ר' שמואל ברח"ד פריעד הי"ו.
ר' יואל ברי"ה פערל הי"ו.
ר' שאול ברי"ש בראך הי"ו.

שביעי: הרה"ח ר' קאפל בערגער הי"ו. אחרון: הרה"ח ר' ישראל מאיר פריעדמאן הי"ו (וומסב''ג), הגבה: הרה"ח ר' וואלף שווארטץ הי"ו (וומסב''ג), גלילה: הרה"ח ר' שמואל אהרן זינגער הי"ו.
מפטיר - קריאת ר"ח: הרה"ג ר' יצחק שלום פריעדמאן שליט"א מו"ץ. הגבה: הרה"ח ר' שלום לאנדא הי"ו. גלילה: הרה"ח ר' אברהם פישער הי"ו (וומסב''ג).

צו תפילת מוסף איז דער רבי צוגעגאנגען לכבוד שבת ר"ח, פתיחה צו אנעים זמירות: הרה"ח ר' יוסף יודא יאקאבאוויטש הי"ו (וומסב''ג).

נאכן דאווענען איז פארגעקומען א ברית לבן הנולד אצל ר' אברהם בר"ש יאקאבאוויטש הי"ו, ווי דער רבי איז געווען סנדק. מען האט געענדיגט ארום 1:15.

נאכמיטאג ארום 7:45 איז דער רבי אריינגעקומען אין ביהמ"ד צו פרקי אבות, דער רבי האט זיך געשטעלט אויף פרק ד' משנה י"א 'רבי אליעזר בן יעקב אומר העושה מצוה אחת קונה לו פרקליט אחד' 'מצוה אחת' מיינט מען פריה ורביה, אמונה, קריאת שמע, און מילה, און געטייטשט אויף 16 אופנים בדרך דרוש ואגדה, און געזאגט מוסר לקראת די ימי הקיץ הבעל"ט און מעורר געווען נזהר צו זיין בשמירת עינים און שמירת הברית און מיט דעם קונה זיין א פרקליט אחד צום יום הדין, און מסיים געווען בברכת קדשו. מען האט געענדיגט ארום 8:45, און דער רבי איז אריין בחדרו הפרטי.
רעוא דרעווין

צו מנחה ושל''ש דער רבי איז אריינגעקומען אין ביהמ''ד ארום 9:00. מנחה: הרה"ח ר' אברהם משה טויב הי"ו. הוצאה והכנסה: הרה"ח ר' אברהם משה היימאן הי"ו (לאנדאן). כהן: הרה"ח ר' יצחק אליקים שווארטץ הי"ו. לוי: הר"ר יושע אייזען הי"ו. שלישי: הרה"ח ר' חיים בער אדלער הי"ו. הגבה: רבינו שליט''א. גלילה: הרה"ח ר' מענדל פרענקל הי"ו.

זמירות ביי של"ס האט דער רבי מכבד געווען. אודה: הרה"ח ר' נח גפן הי"ו, שיר המעלות: הרה"ח ר' משה גאלדשטיין הי"ו.

רבינו שליט''א האט געזאגט אויפן פסוק 'ויקח קרח' און געטייטשט אז דורך דעים וואס מען געט זיך נישט תענוגי עולם הזה קען מען שעפן חיות דקדושה מכח יעקב אבינו און קיינמאל נישט נדחה ווערן פון די קדושה, יעצט בימי הקיץ דארף מען זעהן נישט נאכצולאזן גארנישט פון א גאנץ יאר און זיך גרייטן צו די הייליגע טעג.

ידיד נפש: הרה"ח ר' זושא רובין הי"ו (וומסב''ג), קל מסתתר: הרה"ח ר' חיים העללער הי"ו (וומסב''ג), דער רבי האט געבענטשט על הכוס.

מעריב מוצש''ק: הרה"ח ר' שאול לייב זאלדאן הי"ו. נאך הבדלה איז דער ציבור אריבער זאגן א גוטע וואך. מען האט געענדיגט ארום 11:15.

▫ סאטמאר'ע נייעס 🌴

פרייטאג ערש''ק קרח 'בצל הקודש' פון כ''ק רבינו הגה''ק שליט''א

אינדערפרי איידער תפילת שחרית איז פארגעקומען די ברית'ן:
לבן הנולד אצל ר' יחיאל אלטר ברא"מ טויב הי"ו, ווי דער רבי איז געווען סנדק ומוהל.
לבן הנולד אצל ר' יקותיאל יודא בר"י שטיין הי"ו, ווי דער רבי איז געווען סנדק ומוהל.
לבן הנולד אצל ר' משה ברי"י היימליך הי"ו, ווי דער רבי איז געווען סנדק.
לבן הנולד אצל ר' אהרן ברי"א זילבערשטיין הי"ו, ווי דער רבי איז געווען סנדק.

רבינו שליט''א האט געדאווענט שחרית אין תלמוד תורה בנין הירש ג"ב לאנדא אינאיינעם מיט די תלמידי כתות ו' ז' ח' סניף הר"ר נפתלי הירצקא פריעדמאן שליט"א.
ביים אנקומען איז דער רבי צום ערשט אריין אין איינע פון די כיתות און זיך אומגעקוקט אויף די לימודים און פארהערט די קינדער.

פארן דאווענען האט דער רבי געלייגט תפילין פאר די בר מצוה בחורים.
ב"ר יואל נפתלי לאנדא הי"ו.
ב"ר זלמן לייב פיש הי"ו.

נאכן דאווענען איז פארגעקומען א מסיבת לחיים בהיכל הביהמ"ד, די קינדער האבן געזינגען עטליכע ניגונים און חרוזים, און דער מנהל שליט"א האט איבערגעגעבן פארן רבי'ן א ליסטע מיט די שעות לימוד התורה מיט וואס די קינדער האבן זיך צוגעגרייט צום רבינ'ס באזוך, דער רבי האט געטרינקן לחיים און אנגעוואונטשן פאר אלע מלמדים און קינדער און פאר די בר מצוה בחורים, און משמיע געווען דב"ק און ארויסגעברענגט אז מען דארף זיך אפלערנען פון די פרשת השבוע די הארבקייט פון מחלוקת און מסיים געווען בברכת קדשו.

▫️ סאטמאר'ע נייעס 🌴 ▫️

דאנערשטאג פרשת קרח 'בצל הקודש' פון כ''ק רבינו הגה''ק שליט''א

דער רבי האט געדאווענט שחרית בהיכל המתיבתא סניף ברך משה. ביים ליינען האט דער רבי עולה געווען שלישי, און נאכן דאווענען פארגעלערנט א שיעור סוגיא בשיעורי הישיבה.
נאכן דאווענען האט דער רבי טעלעפאוניש מנחם אבל געווען הר"ר יחזקאל ראטער הי"ו מראשי מוסדותינו הק' אין בני ברק, און זיינע ברודערס, ע"פ אביהם הרב החסיד המרומם ז"ל.

נאכמיטאג ארום 7:30 איז דער רבי אנגעקומען אין ביהמ"ד בית ברוך צו די חגיגת הכנסת ספר תורה אריינגעגעגעבן דורך הרה"ח ר' חיים אברהם ווייס הי"ו, דער רבי האט איבערגענומען די ס''ת און אפגעראכטן די ריקודי קודש, און מכבד געווען בנו הגה"צ רב הביהמ"ד שליט"א און דער בעל שמחה צו טאנצן מיט די ספר תורה, און דערנאך פארגעזאגט לדוד מזמור כנהוג, און מאציל געווען מברכות קדשו פארן בעל שמחה הרה"ח ר' חיים אברהם הי"ו ובני משפחתו.

זמני כניסה בקו''פ איז געווען פון 8:00 ביז 11:30 אויפדערנאכט, בביתו נאוה קודש אויף איהעל קט.

ארום 9:15 האט דער רבי געדאווענט מנחה בביתו נאוה קודש.

בעת די זמני כניסה האט זיך דער רבי טעלעפאניש פארבינדן מיט הר"ר אלי' שלמה קאהן שליט"א מנהל בית רחל קר"י, און הר"ר מאיר יוסף בר"א גראס שליט"א מנהל מחנה בית רחל, ווי דער רבי האט זיך נאכגעפרעגט וויאזוי עס איז אריבער די ערשטע וואך אין קעמפ, און אויסגעשמועסט פארשידענע ענינים און מאציל געווען מברכת קדשו.

רבינו שליט''א האט געליינט תנאים אין די תנאים זאל בביתו נאוה קודש פון די מחותנים הרה"ח ר' יואל משה רייז הי"ו - הרה"ח ר' ישעי' זילבערשטיין הי"ו (וומסב''ג).

נאך די תנאים האט דער רבי האט געדאווענט מעריב, און דערנאך ווייטער ממשיך געווען אויפנעמען דעם ציבור.

▫ סאטמאר'ע נייעס 🌴

מיטוואך פרשת קרח 'בצל הקודש' פון כ''ק רבינו הגה''ק שליט''א

דער רבי האט געדאווענט שחרית בהיכל המתיבתא סניף ויואל משה. פארן דאווענען האט דער רבי געלייגט תפילין פאר'ן בר מצוה בחור ב"ר יצחק חיים שאלילאף הי"ו.

נאכן דאווענען האט דער רבי פארגעלערנט דעם טעגליכן תהילים שיעור אויף קאפיטל כ"ב פסוק א'. דערנאך איז פארגעקומען א לחיים מיט'ן בר מצוה בחור בחדרו הפרטי.

אין די פארמיטאג שעה'ן איז דער רבי געווען אויף די וועכענטליכע באזוך אינעם בית השחיטה המהודרת.

ארום 8:15 האט דער רבי געדאווענט מנחה בביתו נאוה קודש אויף איהעל קט.
דערנאך איז געווען זמני כניסה בקו''פ ביז 12:50 אויפדערנאכט.

רבינו שליט''א האט געליינט תנאים אין די תנאים זאל בביתו נאוה קודש פון די פאלגענדע מחותנים.
הרה"ח ר' אברהם יושע גפן הי"ו - הרה"ח ר' שמואל שמעון בערקאוויטש הי"ו.
הרה"ח ר' יחזקאל פרענקל הי"ו - הרה"ח ר' שלמה משה וויינבערגער הי"ו.

עס זענען אריין בקו''פ די עסקנים פון די 'אנ"ש וואל קאמיטע' און האבן איבערגעגעבן א באריכט פון די פארגאנגענע פריימערי וואלן און די ענדגילטיגע רעזולטאטן ווי די אנ"ש אינדארסירטע קאנדידאט האט געווינען די ספעציעלע קאנסערוואטיווע פריימערי מיט בלויז 37 שטימען בס''ד, דער רבי האט אנגעוויזן און אויסגעשמועסט איבער גאר וויכטיגע זאכן לטובת הכלל וואס מען האפט בעז"ה צו קענען אויפטון אלעס אדאנק די געטריישאפט פון די עטליכע הונדערט תושבי קרית יואל וואס האבן זיך אנגעשטרענגט ארויסצוקומען שטימען, און מאציל געווען מברכת קדשו.

דער רבי האט געדאווענט מעריב ארום 12:50.

▫️ סאטמאר'ע נייעס 🌴 ▫️

דינסטאג פרשת קרח 'בצל הקודש' פון כ''ק רבינו הגה''ק שליט''א

אינדערפרי איידער תפילת שחרית איז פארגעקומען די ברית'ן:
לבן הנולד אצל ר' נפתלי קאהן הי"ו, ווי דער רבי איז געווען סנדק ומוהל.
לבן הנולד אצל ר' שמעון נפתלי רובינפעלד הי"ו, ווי דער רבי איז געווען סנדק ומוהל.
לבן הנולד אצל ר' אפרים פרידריך הי"ו, ווי דער רבי איז געווען סנדק.

רבינו שליט''א האט געדאווענט שחרית בהיכל המתיבתא סניף עצי חיים שיעור ג'. פארן דאווענען האט דער רבי געלייגט תפילין פאר די בר מצוה בחורים.
ב"ר אברהם יושע גפן הי"ו.
ב"ר נפתלי זאב כ"ץ הי"ו.
ב"ר דוד ווייס הי"ו.
ב"ר יצחק יואל גאלדבערגער הי"ו.

נאכן דאווענען האט דער רבי פארגעלערנט דעם טעגליכן תהילים שיעור אויף קאפיטל כ"ב פסוק א', און ארום גערעדט בדאבון לב איבער די ביטערע גזירת גיוס בני ישיבות בארה"ק, דערביי האט דער רבי פארופן קומענדיגען ערב ר''ח אלול הבעל''ט פאר א אלטוועלטליכע יום תפילה פארן גאנצן יהדות החרדית, אנשים נשים וטף, פון אלע מדינות, ביום אחד ובשעה אחת.

דערנאך איז פארגעקומען א לחיים מיט די בר מצוה בחורים בהיכל הביהמ"ד.

נאך שחרית האט דער רבי מנחם אבל געווען ר' חיים אפרים בן הרה"ג ר' מאיר צוויבל שליט"א ע"פ בתו ע"ה.

נאכמיטאג איז דער רבי ארויף בהיכל הישיבה סניף קדושת יואל ווי דער רבי האט געלערנט מיט א חברותא בחדרו הפרטי. און ארום 6:00 האט דער רבי געדאווענט מנחה אין ישיבה.

פארנאכטס איז דער רבי אריינגעפארן קיין וומסב''ג צו די וועכענטליכע זמני כניסה.
זמני כניסה בקו''פ איז געווען פון ארום 8:50 ביז 11:45 אויפדערנאכט, בביתו נאוה קודש אויף היוז סט.

בעת די זמני כניסה איז אריין בקו''פ הגה''צ ר' אברהם יהושע העשיל שליט"א מקאפיטשניץ ב"פ מקבל זיין ברכת הקודש לרגל שמחת נישואי בנו למז"ט, און דער רבי האט מאציל געווען מברכת קדשו.

דער רבי האט געדאווענט מעריב ארום 10:15 און דערנאך ווייטער ממשיך געווען אויפנעמען דעם ציבור.

נאך די זמני כניסה איז דער רבי געפארן קיין ב"פ אין ביהמ''ד קאסוב ווי דער רבי האט מנחם אבל געווען האדמו''ר מקאסוב זאליטשיק שליט"א און די גאנצע משפחה לבית קאסוב היושבים ע"פ אחיו/ אביהם כ"ק אדמו"ר מקאסוב זצ"ל, עס האט זיך פארמירט א שיינע שמועס פון זכרונות פון רביה"ק בעל דברי יואל זיע''א און סיפורים פון הרה"ק בעל עצי חיים זיע''א און דער רבי האט געוואונטשן ברכת תנחומין.

פון דארט איז דער רבי אריבער אין שטוב פון נכדו הרב ישראל דושינסקיא שליט"א בן חדב"ן הגה"צ רב דביהמ"ד אהל פיגא שליט"א, דער רבי האט קובע געווען א מזוזה און געטרינקן לחיים, עס האט זיך פארמירט א שיינע שמועס און דער רבי האט מאציל געווען מברכות לרוב. און ארום 12:45 האט זיך דער רבי ארויסגעלאזט אויפן וועג אהיים לביתו נאוה קודש אין קר"י.

▫️ סאטמארע נייעס 🌴 ▫️